Mema Maori Mo Te Kaunihera.

Ko Hone Heke.—Ka patai ahau ki te Kawanatanga, Mehemea tera e whakaturia etahi Maori, hei mema mo te Kaunihera, hei whakakapi i nga tuunga o roto o taua Rununga kua watea nei i te matenga o Hon. Wi Tako me Hon. Meiha Ropata? Te take i uia ai tenei patai he mea noku kia whaimahara te Kawanatanga ki nga uri o Tamati Waka Nene ina whakakapia aua tuunga. He tangata tenei i tino kaha atu tana hapai i te taha ki te koroni me te Kawanatanga o Ingarangi i nga whawhai o mua ki nga Maori. Ki taku mahara kei te whakaae nga mema honore katoa, ko te tikanga tenei page 38o Ingarangi me hoatu aua tu nohoanga ki nga tangata e tautoko ana i te taha Ingarihi. E tino hiahia ana ahau kia ata whiriwhiria tenei mea e te Kawanatanga.

Ko Te Hetana (Right Hon. Mr. Seddon).—E kore e karanga noa iho te Kawanatanga i te tangata ki te Kaunihera, ka ata whiriwhiria ano ko nga tangata e tino kaha ana o ratou take e whakaturia ai ratou hei mema mo te Kaunihera. He maha nga tono mo aua tuunga kei te takoto a he mahi tino uaua te whiriwhiri i aua tono. Ka tino tupato te whakahaere a te Kawanatanga mo tenei mea.

Ko Hone Heke.—E ui atu ana ahau ki te Kawanatanga mehemea tera ranei e whakaturia etahi Maori?

Ko Te Hetana (Right Hon. Mr. Seddon).—Kaore ano tena i tau i nga Minita. Ko tona tikanga kia mutu te Paremete ka karanga ai i tetahi tangata hei mema mo te Kaunihera. He nui rawa no nga raruraru o nga Minita kaore ano ratou i whai-taima ki te whakahaere i nga mea e patairia nei.

Haere tonu te mahi a te Whare, a no te weherua i te po ka mutu.