I.
Mo Te Ahua O Te Hahi I Tenei Wa.

Ka nui te pouri o tenei Hinota ki te ahua o te Hahi i tenei Pihopatanga i tenei wa, ka kitea nei ki te tokomaha o nga Hinotamana e ngaro atu nei i runga i nga raruraru o o ratou wahi; He ki hoki tenei na tenei Hinota ki nga tangata katoa o te Hahi i tenei Pihopatanga kia anga ki te whakaiti i a ratou ki te aroaro o te Atua, ki te whaki i nga hara ki a ia, me te inoi atu ano ki a ia me kore ia e pai kia whakakahoretia nga raruraru, kua takina mai nei e o tatou hara ki runga ki a tatou.

II.
Mo Te Whiriwhiringa I Nga Hinotamana.

1.	I te mea kahore ano kia marama noa te maha o nga tangata o ia Pariha o ia Pariha, me waiho ma te Pihopa e whakarite te tokomaha o nga Hinotamana mo te Hinota Pihopatanga, me te tokomaha hoki o nga Hinotamana mo ia Pariha mo ia Pariha.
2.	Ko te wa pai mo te whiriwhiringa i nga Hinotamana o ia Pariha, o ia Pariha, ko nga ra o Tihema.
3.	Ko nga kai whakahoki, ma te Pihopa e karanga; a, ma nga kai whakahoki e whakarite he tapiri mo ratou.
4.	Kei te whiriwhiringa o nga Hinotamana, kia marama te ki a te tangata i roto i tana pukapuka whiriwhiri, he tangata ia no te Hahi o Ingarangi o Aearani i Niu Tireni. Ki te huihuia he tokomaha nga tangata i roto i te pukapuka kotahi, e pai ana; ki te mea na te tangata kotahi tana pukapuka e pai ana.
5.	Me whakamahara e te Kai whakahoki nga tangata o tona wahi ki te wa o te whiriwhiringa o nga Hinotamana: ko tana karanga kia puta i nga ra o Nowema.
6.	Ka oti te whiriwhiri tetahi tangata ekore ia e tu hei Hinotamana kia taea ra ano te ra tuatahi o Hanuere; ekore hoki e tu tonu hei Hinotamana i te mea kua pahure te 31 o nga ra o Tihema o te tau i whakaturia ai ia hei Hinotamana.
7.	Ka oti te whiriwhiri he Hinotamana mo tetahi Pariha, hei reira tonu ka tuhituhia ai e te kai whakahoki he pukapuka whakaatu ki te Pihopa. Ko te pukapuka whakahoki, ma te Hinotamana ano e kawe ki te Pihopa i tona haerenga ki te Hinota.page 23
8.	Ki te watea te wahi o te Hinotamana o tetahi Pariha i te mate, he mea whakawatea marire ranei nana; ma te kai whakahoki e mea kia whiriwhiria e nga tangata o tana Pariha he whakakapi mona. Ko te whakakapi mo taua Hinotamana me whiriwhiri i roto i nga marama e rua, i muri iho i te wateatanga o te nohoanga o te Hinotamana tuatahi.
9.	Ko nga whakahokinga e whakahengia ana, me homai ki te aroaro o te Hinota whakawa ai.
10.	Tauira mo te pukapuka whiriwhiri:—

He tangata {ahau matou} no te Hahi o Ingarangi o Aearani i Niu Tireni; a, e mea ana {ahau matou} ko hei Hinotamana mo tenei Pariha mo te tau e takoto ake nei.

III.
Mo Te Tuuturu A Te Hinota O Te Pihopatanga O Niu Tireni.

He whakaae tenei na tenei Hinota ki te Tuuturu o te Hinota o te Pihopatanga o Niu Tireni, i whakatakotoria i te tahi o nga ra o Maehe 1861, ara: "Ki te kahore e whakahuatia tetahi Minita ki te Pihopa i roto i nga marama 12 i muri iho i te whakaaturanga a te Pihopa i te wateatanga o te Pihopa, ma te Pihopa e whakarite he Minita mo taua Pariha, ahakoa kahore i whakahuatia e nga Kai whakahua." Me whakaatu hoki e te Pihopa tenei Tuuturu ki te Komihana Tuuturu o te Hinota Nui.

IV.
Mo Nga Minita Hei Kai Whiriwhiri Minita Hei Mangai Mo Ratou Ki Te Hinota Nui.

I te mea e whiriwhiria ana he Minita hei mangai mo nga Minita o tenei Pihopatanga ki te Hinota Nui; heoi ano nga tangata mana e whiriwhiri, ko nga Minita e hoatu nei nga ingoa ki te tino Kai Rehita Marena e te Pihopa o tenei Pihopatanga.

V.
Mo Te Mahi A Nga Tangata I Nga Mahi Maori A O Ratou Minita.

Kia tohea ano ki nga tangata o ia wahi o ia wahi te tikanga o tenei mea, kia puta te atewhai o nga tangata katoa ki o ratou Minita, ina hoki he mahi ta te Minita ki runga ki nga tangata, kia mahi hoki nga tangata i ta te Minita.

I te mea kahore he Hahiwatena hea akiaki i tenei mahi, ma te Hinotamana e whakatakoto ki te Runanga o ia wahi o ia wahi, kia kohikohia he kai i te takiwa o te ngahuru ka hoatu tahua ai ki te Minita.

VI.
Mo Te Moni Utu Mo Te Perehitanga O Nga Mahi A Te Hinota.

Kia puta te ki ki nga Pariha katoa o tenei Pihopatanga kia homai nga hereni 15 e ia Pariha e ia Pariha i roto i tenei tau mo te perehitanga i nga Mahi a te Hinota. Me hoatu aua Moni e nga tangata o te Pariha ki te Minita, a mana e homai ki te Komiti Tuuturu o te Hinota.

VII.
Mo Nga Pariha Kahore Ano I Kohikohi Moni Whangai Minita.

He maha nei nga Pariha kahore i kitea nga ingoa i roto i te pukapuka a te Komiti Tuuturu mo nga moni whangai Minita, kia takoto te kupu ki nga Pariha katoa e tomuri ana ki tenei mahi, kia hohoro te whakarite i te tahua i karangatia hei whangai Minita mo ia Pariha mo ia Pariha.

VIII.
Mo Te Tahua Oranga Mo Te Minita Mate.

Kia tirotirohia e te Komiti Tuuturu te tikanga o nga Kupu o te Hinota Nui te i tau 1862, mo te oranga mo te Minita ina rokohanga e te mate nui, e kore ia ia e ahei te hoki ki runga ki tana mahi: mo te pouaru hoki o te Minita, mo ana tamariki pani. Kia rapua hoki e te Komiti Tuuturu he tikanga mo tetahi Tahua mo tena mea; kia Korerotia hoki ki te Hinota i te Whakaminenga e takoto ake nei.

IX.
Mo Nga Kura Tamariki.

Kia takoto he Kupu ki nga Minita ki nga Kai whakaako:

X.
Mo Nga Whare Minita.

Me akiaki nga tangata o ia kaainga, o ia kaainga, kia hangaa he whare Minita i nga kaainga whare kore; kia whakaotia nga whare e hangaa ana; kia whakahoutia nga whare tawhito.

Kia whakaaro nga Pariha katoa ki nga whare Minita kia whai kakahu a roto o aua whare Minita, o ia wahi o ia wahi o tenei Pihopatanga.

XI.
Mo Te Kawe I Te Rongo Pai.

E mea ana tenei Hinota, he iti rawa te whakaaro o nga tangata o te Hahi i tenei Pihopatanga, ki te nui o nga mea pai kua whakawhiwhia mai nei e te Atua ki a tatou, i te mea kua homai nei e ia te Rongo Pai o te Karaiti ki tenei wahi; na te Karaiti nei hoki te ki: "Kua riro noa atu nei i a koutou, me hoatu noa e koutou."

Ko te mea tika hoki tenei kia uaua nga Pariha katoa ki te kohikohi i etahi moni, hei kawe i te Rongo Pai ki nga Tauiwi, kia whiwhi tahi ai nga iwi katoa ki nga tohu o te aroha noa o to tatou Atua.